गजल

Alone शत्रु पनि छैन यहाँ, हसाईदिने साथि कतै
छँदै छैन कठै भन्ने नेपाली त्यो छाति कतै॥

कंक्रिट छ जताततै नुनै नुन सागरमा
पोखराको ताल छैन चितवनको हात्ती कतै॥

एकतमासको मन बोकी व्यस्त शहर कुदिरन्छ
नर्क पनि छैन यहाँ स्वर्ग छैन माथि कतै॥

देख्ने गर्छु सपनामा आफ्नै थलो साथिसँगी
पानी पनि खान नपाई मर्छुकी त राति कतै॥

एक्लै रुन्छु परदेशको झिलिमिली आँसु हुन्छ
जति नै म मरेपनि हुँदै हुन्न जाति कतै॥

मुक्ति मलाई दिलाईदेऊ पशुपती परमेश्वर
साथी उनलाई चढाइदेऊ फूल र पाती कतै॥

Advertisements