एक टुक्रा

रुन्छ, हास्छ, नाच्छ, गाउँछ, रमाउँछ रहर
बेच्छ रहर, किन्छ रहर, कमाउँछ शहर
दासी रहर, प्यासी शहर, सपनाको आँधी
आँधी मनको जमाउँछ, बनाउँछ जहर ।।

अस्तित्वको उत्खनन्

कहिले कही मलाई हेर्न मन लाग्छ
मस्तिष्क भित्रको भाव
र
भाव भित्रको ब्रम्हाण्ड
तर
कुनै छुट्टै कोणबाट –
जहाँ देखि
सम्पूर्ण कुरा स्पष्ट देखिउन
बगिरहेको समयको छाल देखियोस
बदलिंदो उमेर देखियोस
बालापन देखियोस, बैंस देखियोस

मलाई हेर्न मन लाग्छ
एउटा अर्को ब्रम्हाण्ड
जहाँ म र मेरो अस्तित्व
स्पष्ट देख्न सकौं

त्यो अस्तित्व
जो
एउटा विशाल शुन्यका
अशङ्ख्य मध्येको एक पिण्डमा
अपरिमित समयको कुनै एक क्षणमा
आफ्नो सम्पुर्ण जीवन बाँचिरहेछ।